நாயகன் படத்தில் சிவாஜி கணேசன்? மணிரத்னத்திற்கு முன்னாடி இவர்தான் இயக்குனரா? புது தகவலா இருக்கே!

கிளாசிக் திரைப்படம்

தமிழ் சினிமாவின் கிளாசிக் திரைப்படமாக அமைந்த “நாயகன்” திரைப்படம் 1987 ஆம் ஆண்டு வெளியானது. மணிரத்னம் இயக்கத்தில் கோலிவுட்டின் டிரெண்ட் செட்டர் திரைப்படமாக அமைந்த இத்திரைப்படத்தில் கமல்ஹாசனின் அபாரமான நடிப்பு காலம் தாண்டி இப்போதும் பேசப்பட்டு வருகிறது. 

காட்ஃபாதர்…

“நாயகன்” திரைப்படத்தின் கதை பம்பாயில் மிகப் பிரபலமான ஆளாக வலம் வந்த வரதராஜ முதலியார் என்ற தமிழரின் வாழ்க்கையை மையமாக வைத்து உருவான கதையாகும். மேலும் ஹாலிவுட்டில் வெளிவந்த “காட்ஃபாதர்” திரைப்படத்தின் சில காட்சிகளை தழுவியும் இத்திரைப்படம் உருவாக்கப்பட்டிருந்தது. இந்த நிலையில் “நாயகன்” திரைப்படத்தின் தயாரிப்பாளரான முக்தா சீனிவாசனின் மகனான முக்தா ரவி சமீபத்தில் ஒரு பேட்டியில் கலந்துகொண்டபோது “நாயகன்” திரைப்படத்தை குறித்த ஒரு அரிய தகவலை பகிர்ந்துகொண்டுள்ளார். 

நாயகனில் சிவாஜி…

அதாவது “காட்ஃபாதர்” திரைப்படத்தை அப்படியே தமிழில் தழுவி படமாக்கலாம் என்று தயாரிப்பாளர் முக்தா சீனிவாசன் முடிவு செய்திருந்தாராம். அதன் படி சிவாஜி கணேசனை தந்தை கதாபாத்திரத்திலும் கமல்ஹாசனை மகன் கதாபாத்திரத்திலும் நடிக்க வைக்க ஒப்பந்தம் செய்திருந்தாராம். இத்திரைப்படத்தை முக்தா சீனிவாசனின் மூத்த மகனான முக்தா சுந்தர் இயக்குவதாக இருந்ததாம்.

ஆனால் திரைக்கதை ஆசிரியர் அனந்து ஒரு யோசனை கூறினாராம். அதாவது சிவாஜி கணேசனும் கமல்ஹாசனும் இணைந்து ஏற்கனவே “நாம் பிறந்த மண்” என்ற ஒரு படத்தில் தந்தை மகனாக நடித்திருந்தார்களாம். ஆதலால் இத்திரைப்படத்தை சற்று மாற்றியமைக்கலாம் என்று அனந்து கூறினாராம். 

அதன் பிறகு மணிரத்னம், வரதராஜ முதலியாரின் கதையை வைத்திருக்கிறார் என்று தெரிய வந்தவுடன் அந்த கதையையும் “காட்ஃபாதர்” தழுவலையும் இணைத்து ஒரு திரைப்படத்தை தயாரிக்கலாம் என முடிவு செய்தாராம் முக்தா சீனிவாசன். அவ்வாறு உருவான திரைப்படம்தான் “நாயகன்” என அப்பேட்டியில் பகிர்ந்துகொண்டுள்ளார் முக்தா ரவி. 

எல்லோரும் இணையும்போது பலம் கூடுது- ரம்யா கிருஷ்ணன், ஜோதிகா ஆகியோருடன் திரிஷா வெளியிட்ட உருக்கமான வீடியோ…